Mæli með: SoulCycle

Skemmtilegasta líkamsræktin að mínu mati er að hjóla, hvort sem það er inni eða úti. Ég kenndi spinning í nokkur ár og kenni í dag annars konar hjólatíma, Coach by color og svo hjóla ég líka úti á sumrin.

Þegar ég byrjaði að fljúga fyrir nokkrum árum þá vantaði mig svo hvatningu til þess að æfa vel í stoppum. Ég hafði heyrt af SoulCycle en vissi ekki um neinn sem hafði prófað. Ég ákvað því að slá til og skella mér í tíma og það var ekki aftur snúið. Ég hef nefnt SoulCycle nokkrum sinnum á snappinu okkar, RVKfit, og alltaf fengið margar spurningar um það. Þá hef ég dregið fjöldan allan af samstarfsfólki mínu með í spinningtíma og hafa allir verið jafn hrifnir og ég sjálf.

SoulCycle er spinningstúdíó sem eru staðsett víðsvegar um Bandaríkin og Kanada. Hver spinningtími er 45 mínútur og er markmið SoulCylcle að auka bæði andlega og líkamlega vellíðan. Tímarnir eru þannig uppbyggðir að samhliða líkamlegri áreynslu kemur mikil andleg hvatning frá kennurunum, sem hafa allir gengið í gegnum víðamikla þjálfun. Þetta hjómar eins og algjör klisja en er í raun eitthvað mest hvetjandi líkamsræktarkerfi sem ég hef prófað. Í hvert sinn sem ég geng út úr tíma hugsa ég eitthvað jákvætt og hvetjandi um sjálfa mig. Það fer að sjálfsögðu eftir kennurum hvernig hver og einn tími er, en kennararnir eru mishvetjandi og hafa misjafnan tónlistarsmekk, eins og eðlilegt er.

635921362837423737-2043380404_soulcycle-logo

Það sem einkennir hvað helst SoulCycle er ef til vill það að spinning salurinn er upplýstur með kertaljósum en ekki diskóljósum eins og við þekkjum eflaust hér á Íslandi. Þegar ég heyrði af kertaljósunum bjóst ég við að vera að fara í einhvern „slökunar“ spinningtíma en það er þvert á móti þannig. Tónlistin er afar fjörug svo það verður til hvetjandi stemning í salnum. Tónlistin er yfirleitt sú vinsælasta hverju sinni i bland við gamla og góða smelli en auk þess er oft boðið upp á þematíma þar sem einn tónlistarmaður er tekinn fyrir. Ég hef til dæmis farið í bæði Taylor Swift og Beyonce tíma og það kom virkilega á óvart hversu gaman það var. Tímarnir í heild sinni eru miserfiðir eftir kennurum en í hverjum tíma er tekin ein lota þar sem unnið er með handlóð, sem brýtur upp tímann á skemmtilegan hátt.


Ef þið eigið leið um Bandaríkin eða Kanada hvet ég ykkur til þess að prófa SoulCycle, þið verðið ekki svikin. Fyrsta tíma fylgja spinningskór en svo er alltaf hægt að leigja þá á mjög lítinn pening (3$). Fyrir ykkur sem hafið áhuga er hægt að lesa betur um SoulCycle hér og svo megið þið auðvitað alltaf senda á mig spurningar. Á vefsíðunni má einnig finna verðskrá og staðsetningar á stúdíóunum, en þau eru staðsett í öllum helstu borgum Bandaríkjanna sem og Kanada.

Góða skemmtun í SoulCycle!

xx

Ingibjörg Thelma

Skildu eftir svar